Greek tawng chuan HMANGAIHNA hi chi hrang hrangin an sawi thin a, Storge (Kan chhungte leh kan laina te kan hmangaihna) te, Philia (kan thiante kan hmangaihna) te, Eros (Mipa leh Hmeichhia inkara hmangaihna) te leh Agape (chhan leh vang awm loa hmangaihna) te hi an ni. Pathian hian keini mihringte hi Agape hmangaihna ang hian min hmangaih a ni. Tin, Matthaia 5;43-44 thuah khan kan Pathian chuan kan hmelmate hmangaih tur leh min tiduhdahtu pawh tawngtaisak turin min zirtir a, keini chuan kan hmelmate chu sawi loh; kan vengte, kan thiante pawh kan hmangaih hlei thei lo a, min hmangaihtute ngei pawh kan hmangaih zo meuh lo a nih hi.
Heti hian han ngaihtuah leh dawn chhin teh ang: Kan Pathian hian vanah khian tlansa tamtak a nei a, kan chawimawi a, kan hmangaih ve kher loh pawh hian a ropui lutuk a; hmangaih a, a lalna tizual zel tur hian chhete pawhin min mamawh lo (hei aia sawi fiah theih hi ka chak hle mai), mahse van mite khian an chelh ding zo lo a sin! Mihring hi eng nge maw kan nih a,
keini ve tehlul hi engvanga min hmangaih a, min chelh tlat nge a nih ang ka ti thin. Hmangaih tlak loh min hmangaih a, kan chhungril ber pawh hrechiang em emtu hian kan sualzia ang zel hian min thungrul ni ngat se zawng mualpho taka min siam a, khawvel eng hmu ve ngam tawh lo tur khawpa min siam theitu a ni a; mahse, min hmangaih em avang hian kan mualpho te hi a lo phal lo a, mite min hmuhsit te hi lo phal reng reng lo nia maw le....
Kan Pathian hnenah hian eng nge kan dil ve thin? In ropui leh Lirthei tha ber ber, sum leh changkanna te em ni? Lal Solomona khan Pathian hnenah finna a dil a, a fing em em reng bawk a; amaherawhchu, tunhnaiaa hla phuahte leh a zaithiam em vanga kan lo hmelhriat Jonathan Lianhna erawh chuan 'amah fak theih' a dil a ni, a van ropui tak em! A nawmna tur leh a hmingthatna tur te chu a hre ve reng tho ang, mahse amah fak theih a duh ber thu hla hmangin a tlangaupui mai a ni. Tin, Pathian hmangaihna mak leh rilzia chu Matthaia 20-ah khan Grep huana inhlawhfate tih kan hmu a, he thu ka chhiar apiang hian Pathian hmangaihna hi a langchiang zualin ka hre thin. Lo neitupa khan a Hnathawktute nen nikhata duli hlawhah an inrem a. Zinga thawk te, fehrehsan a thawk te, chawfak hun te leh behliang mun huna thawk chhuak te, pahmei zanriah chhum hunlaia thawk chauh te thlengin an lawmman a inan vek thu kan hmu a, he thu hi a ropui hlein ka hria.
Mi tamtak chu ram thim ram roah, thi leh thau pawlhin an nunna thapin Pathian hmangaihna leh a chhandamna puang darhin an kal a. Pathian hian hmangaih bik mah se a awm lo hran lo kan tih theuh ka ring. Mahse, Pathian hian mihringte hi min hmangaih em a; kan duh duh eia in in, nuam sa tak chungin rawng kan bawl ve a; kan lawmman a inang vek dawn a nih chu maw le, a van ropui tak em! Chubakah chuan mite chuan rei tak chhung Pathian tan an nun te an lo hmang tawh a, krista tana ban rinawm, Krista pasal tha an lo ni tawh thin. Mahse, a thente erawh chuan 'Zanin atang hian Pathian tan ka awm reng tawh ang' tite, 'Nimin lawk kha chuan a la rui thle mai mai a, vawiin atang khan tihtakzetin Pathian tan a nung ta' han tih tur te pawh kan ni mai thei e; Mahse, kan lawmman hmuh tur chu a inang reng a ni.
A tawp berah chuan eng ang mi pawh ni ila, eng din hunah pawh ding ila Pathian hian min hmangaih em em a, hlim taka kan awm theih nan a duh dan zawm mai turin min duh a ni. Lalpa’n a thu malsawm rawh se. Amen.