A hmun : Hnahlan Vengthlang Kohhran Biak In, A hun: 3-4 June, 2023
INRINNI ZAN
Bial Inkhawmpui thu rel, Standing Committee-in bawhzuia ruahmanna a siam anga Bial chhung Kohhran tin ten Inkhawm ṭan hun inang tlang hman a nih tak avangin, zan dar 06:45-ah dar a ri a, kar lovah zai ṭan nghal a ni. A ṭan zana tih awm rengin, 'Ka lawm e Isu' tih hla hmangin muang kal raih a bul ṭan niin, chumi zul deuh chiahin hla muang chi bawk sak a ni. Zai boruak a invawr sang tial tial a, mipui pawh an pung tual tual. Hla key an thlak a, tlemin a rang hret a, zaiho pawh a nuam tulh tulh.
Presbyterian Kohhran zepui pakhat, khuang hnih hla lamah an lut ta daih. Ni ropui a lo thleng dawn ta tih hla vawi 3 lak nawn a ni chung pawhin lamtuala lam an awm lo. Kan Pathian hmangaihna thuk zia sak a nih takah chuan Pi Doniangi a rawn lam chhuak hram a. Lalpa chu fakin ka chawimawi ang... han tih takah chuan Khungphah Branch nula pali leh tlangval pahnih an rawn lam chhuak a, Pi Doniangi'n a rawn belhchhah bawk.
Bial Leader, Pu Remtea hruai, Pathian biak inkhawmah hian Secretary, Pu Rdt-an fiah fel fai takin thu a puang a, inhmelhriattirna hun a hmang bawk. Bial puala thawhlawm lak khawm ₹ 2694.00 chu Rev. Dailamthanga, Field Secretary, Lucknow-in Pathian hnenah a hlan a, Hnahlan Vengthlang Kohhran Zaipawlten 'Lalpa, thlipui a tleh chiam a...' tih hla thiam leh pui takin an sa. An music track kha a cial-in a va han class tak!
Tun ṭum Meet-ah hian Speaker atan Bial KṬP O.B te ruat an nih angin, a hmasa ber atan Pu B. Z.K Thanga, Asst. Leader-in Pathian thuchah a sawi a. Ama dinhmun/ chanchin leh rawngbawlna kawnga Pathianin a hruai dan thuhma sei tak, ngaihnawm leh challenging tak a sawi hnuah Pathian thu (Isaia 6:1-9) chhiarin, 'Kei heta hi ka awm' tih thupui hmangin Pathian thuchah ngaihnawm takin a sawi a -
"Pathianin a rawng bawl tura a kohte hian chhuanlam kan siam fo ṭhin a, Isaia erawh chuan chhuanlam a siam ve lo. Chhuanlam kan siam fo a nih chuan, min kotu hian a zung chawpa phawiin min suan mai ang tih a hlauhawm. Chhuanlam siam hi kan Pathian hian a pawm lo tih Mosia leh Jeremia te nun aṭangin kan hmu.
"Pathian kohna dawngtute hi thawh tur nei lo, awm mai mai an ni ngai lo a, mi ṭul tak tak, mi pawimawh tak tak te a ko ṭhin. Pathian hian a rawngbawl turin mi inpe te chauh a ko zawk ṭhin. A hman theih tura kan inpek a ngai a, inpekna tak tak nena a rawng kan bawl a pawimawh. Pathian rawng bawl tur hian duh lam thlan theih a ni lo. A sawmna che i chhang ve dawn em?" ti a zawhna siamin a sermon ngaihnawm tak tlang a kawm.
Lal Isua hmangaihna (Conf. Hla Bu 33) ṭum hnih la nawna sak a nih hnuin, Bialtu Pastor, Rev. V. Lalmuanpuia'n Malsawmnain inkhawm a ṭin.
PATHIANNI CHAWHMA
Bial Standing Commiittee-in Pathianni Chawhma Inkhawm dar vuak hun a tihdanglam angin, dar 10:00-ah dar a ri. KṬP hlapui, 'Kristian Ṭhalaite u lungrual takin...' tih hlaa bul ṭanin, 'Ka nung reng ang Kristaah chuan...' tih hlaa chhun zawm a ni a. 'Chhandamtu min hruai rawh kan zin kawngah hian...' ti chho zelin zai boruak a invawrh sang tial tial a, Biak In chhung leh gallery pawh an khat nghal der. Hla key thlakin, 'Nitin Isua ka thinlungin ka hmangaih deuh deuh a...' tih hla chu khuang nufaa chum chilh zui nghal a ni; lamtual erawh a ruak huai thung.
Mahse maw, 'Mithianghlim kalna kawng hlui kha zawhin...' tih hlaah erawh lamtual a ruak ta bik lo. 'Van hmun ropui hmangaih ram khi...' han tih leh lek phei chuan lamtual mawi tawk tak an awm ta. Biak In zauhna pawhin a dawl zawh tak loah chuan, a kawt lam leh a chung sang lamah nen lam ṭhutna rem belhin an khat nghal hmur.
Bialtu Pastor, Rev. Mamuana'n inkhawm a kaihruai a, Nl. Zamzami, Hnahlan Branch-in ṭanna hun a hmang. Secretary, Pu Rdt-a'n chawhma leh chawhnu inkhawma chanvo nei tur te, a ziak pawh en map lovin, fel fai takin a puang. Inkhawm zat chhiar theih chinah mi 455 niin, thlengtu branch KṬP puala thawhlawm lak khawm ₹ 5150.00 chu Upa Zira, Bial Secretary (Sr)-in Pathian hnenah a hlan.
Kum 2023-2024 chhunga Hnahlan Pastor Bial Zaipawl atana lak thar ten an term chhunga an rawngbawlna hmasa ber atan, Dr. Ramdinthara Sailo hla phuah - 'Mi bawrhsawmte chuan daktawr an ngai a...' tih hla an rawn sa. An vawi khat zaina mah ni se, an thiamin an zai ngaihthlak a manhla hle.
Thuhriltu atana ruat, Bial Leader Pu Remtea chuan Pathian thu (II Timothea 4:5; Thupuan 2:10(b) chhiarin 'Rinawm taka rawngbawlna hlen' tih thupuia hmangin Pathian thuchah a sawi a.
"Rawngbawlna hi eng nge a nih tih ka hriat fiah hma chuan kohhran leh KṬP-a tel ka hreh ṭhin. Amaherawhchu, talent ka neih chhun, member ṭangkai tak ni tura koh ka nih ka inhriat chinah erawh chuan phur taka chu rawngbawlna hlen chhuak tur chuan phur takin ka tel mai ṭhin.
Thih thlenga rinawm tura tih kan nih laia, kum khat emaw lek pawh kan rinawm thei erawh a hrehawmin inen fiah kan ngaihna lai a ni. Pathian hian a rawng bawlnaah hian tih mai mai a duh hauh lo. Theih ang tawka inbuatsaih tur kan ni. Kohhranin mawhphurhna leh tih tur min pek apiang ṭha taka kan hlen chhuah hi a 'rau' lai ber a ni. A huhoa rawngbawlna hi muamin himawm viau ṭhin mah se, mahni chauha tih a ṭul hunah pawh rinawm taka awm hi kan tih tur a ni." tiin Pathian thu ril leh khirhkhan ni lem lo, awlsam taka zawm mai theih tur chi hlir mai chu ngaihnawm takin, hun rei lo te chhungin a sawi a.
Khuangphah Kohhran Zaipawlten 'A lo kal leh dawn Lal Isua...' tih hla an sa. An zaiin Bial Inkhawmpui neih zawh taka an zai a phak chiah loh thuin Chairman-in comment mah se, zai ṭha pangngai tak erawh an ni tho mai.
'Chu hmuna lengte chuan ṭhenna thu an sawi ngai lo, hmangaihtu leh hmangaihte an intawkkhawm ang a, hmangaihnain an leng za tawh ang a...' ti a lung kuai taka Pathian fakna hla sak a nih hnuin, Rev. Dailamthanga, Lucknow Field Secretary-in Malsawmnain inkhawm a ṭin a, thlengtu Kohhranten thingpui ruai tui tak an buatsaih chu Kohhran Hall-ah kilho a ni.
PATHIANNI CHAWHNU
Inkhawm dar rik tawp leh zai ṭan a inrual nghal. 'Min hruai ṭhin ṭiau dup hmunah te...' ti a bul ṭanin, 'Kan vanglai ni te hi a rei lo vang, he khawvela kan cham chhung hian, chuvangin vanglai hun te hmang ṭhain, Lalpa tan i thawk zel ang u...' tih chu 'Rawng bawl tura chhandam' tiin chhunzawm a ni a, 'Ka nung reng ang Kristaah chuan' tin hla sak chhunzawm a ni. Chhandamtu min hruai rawh kan zin kawngah hian han tih takah chuan zai a tui ṭan, kan sa nawn hial! Ni tin Isua ka thinlungin ka hmangaih deuh deuh a... ti a khuang nufaa chum chilh zui nghal kha a va han hit vet vet tak. A hmangaihnaa ka chawlhin ka Pa'n min hre tawh tih hla saka Pi Doniangi rawn lâm chhuak khan khuang rem chiah lo mah se, ama style ve pangngai a nih miau avangin inmil lo viau pawhin a lang lo. Tan dar rik a hnaih avanga a laklawh vang pawh ni lova zai tui vanga sak nawn leh kha a tawk tek tawk hle mai.
Nipui khaw lum uap deuh churh kara Inkhawm hruaitu, Tv. Thangbiakliana, Bial Comt; N.Diltlang Branch kaihhruaiah hian, Secretary-in a tih dan pangngaiin, a ziak en lovin programme hman leh tur zawng zawng leh puan tur dang te fel fai takin a puang leh. Nl. Ngaihnunmawii, Vaikhawtlang Branch-in ṭanna hun a hmang.
Hnahlan Kohhran Zaipawl ten, 'Pathianin khawngaihin, chhandamna kim a siam' tih hla an sa. Bial station leh branch lian ber niin, zaipawl member 60 bawr vel an ni a, an cofi a, conductor, Muantea lah confi bawk, an zai a ropuiin a ngaihnawm nangiang mai.
Speaker pathumna, Bial Treasurer; Pu C. Lalrinpuia, thu sawi tura sawm a ni a. Thu sawitu hmasaten huphurh thu an sawi laiin, ani erawh chuan khawvel thu sawi tur ni lova, Pathian thu sawi tur a nih avanga a huphurh lem lo thu te sawiin, Pathian thu (Rom 12:1) chhiarin, Lal Isua Krista chuan inthuam ula tih thu thupuia hmangin Pathian thuchah a sawi a.
Pu Mapuia chuan, "Khawvel mi ten, Inkhawm inkhawm ṭhinte hian Lal Isua hi kâwrah an hmang a,' tiin min deusawh nan an hmang ṭhin. Amah erawh chu, vawiinah hian, Lal Isua hi kawrah hmang lo ila, vawiinah hian kei hi he hmuna thu sawi tur hian ka ding kher lo ang a, inkhawm tur pawh kan awm lo ang. Lal Isua hi kâwrah hmangin, inthuam nana hmang zel tur kan ni. KṬP hruaitute zingah member-te nawr kal chawpa rawng bawl kan awm ang tih a hlauhawm. Hni hne-a rawng bawltu ni lovin, tih tak zeta rawngbawltu, Branch KṬP hruaitu kan nih loh chuan kan rawngbawlna hian rah ṭha a chhuah thei lo ang. Khawvelah hian ropui nih kan duh a, chawimawi nih kan chak ṭhin. Amaherawhchu, kan inthuamnain a zir loh avangin fak leh chawimawi kan hlawh zo lo fo. Lal Isuaa kan inthuam chhung erawh chuan, eng tikah mah kan mualpho lo ang." tiin hun rei lo te chhungin Pathian thu chah ngaihnawm, ṭha leh nung tak a sawi.
Bial Zaipawlten an rawng bawl ṭum hnihna atan, Pathian fak hla mawi takin an rawn sa leh. 'Aw Lal Isu, misual te ṭhian, fak tawk che thiam lo mah ila, ...ka theihna zawng pawh i ropui nan...' tiin.
Sermon thupui nena inhmeh tak mai, Speaker hla thlan - 'Kei chu Kalvary kraws chauh ka thuam a ni, chu chu ka hlim leh ka lawmna ber, aw Kalvary kraws ka thuam famkim i ni' ti a hlim taka Pathian faka zai hnuin, Champhai North Presbytery Moderator, Upa Daldothanga'n Malsawmnain inkhawm a ṭin.
PATHIANNI ZAN
Thil ṭha ti atana siama awmin, ama kut chhuak kan ni si a, chu thil ṭha tih chu kan awmna turin Lalpan a buatsaih lawk a ni ti a bul ṭanin lak nawn hial a ni a, Lal Isua hmangaihna tiha chhunzawm erawh a key a san deuh avanga tihhniam a ni chungin, a bilha tho lo na na na chu vawi khat sak chhuaha an titawp mai kha a sualna a awm lem lo.
Inkhawmpui (meet) ṭiak zana sak awm renga mawi, 'Inkhawmpui ṭiak tawh lohna' erawh beisei angin a tla na lo a ni ang, lak nawn a hlawh lo tlat. Zai hruaituten inkhawm boruak tur an thlir thiam em maw ni ti tura insiam rem thuaiin hla key an thlak; 'Nangni chhandam fate tho r'u... an rawn tih tak daihah chuan, chung lam pawh a awm hle hle thei lo a ni ang, a rikin a ri hut hut a, lamtual a mawi nghal hmak. Kan nghak reng che kan Lal ber... am rawn ti leh lek phei kha chu e, KṬP Meet a ni na a, Inkhawmpui pangngai ang chiah a ni mai! Biak In chhung boruak chu a sukin a su dup dup a ni ber mai. Pui mep mep tak a ni. Ṭan dar a ri der mai.
Pu Vanlalfakawma, Bial Asst. Secretary-in inkhawm a kaihruai a, Bial Secretary-in zei tak leh dak thlarha programme a puan zawhah fun kim taka lawm thu a sawi zawhin, thlengtu Kohhran ziaktu (Asst. Secretary zawk)in Kohhran hun ruatna leh Committee thu, mipui hriat awm chi te puangin, a nih dan tur rengin, thiam tak leh famkim takin lawm thu leh thupha chawina te a rawn fawmkem nghal.
Mipui 360 zet inkhawmte thawhlawm tling khawm ₹ 4519 chu Upa Robula, Bial Chairman-in Pathian hnena a hlan zawh hnuin, Hnahlan Vengthlang Kohhrana Inkhawmpui a thlen tik apianga mipuite beisei ṭhin, Kohhran Zaipawlpui an rawn zai ta. Beginner department aṭanga Kohhran Upa thlenga zaipawla tel an ni bawk a, Ngai r'u rawngbawltu zawng zawngte u... tih hla an han sa meuh chu pui miah miah tak a ni.
Bial Zaipawlte pawhin thiam tak maiin, 'Van ropuina kalsana Kros thlangtu Isu, ka thlang ber zel fo vang che.' tiin Pathian fak hla an sa bawk.
A tawp zan atana speaker atana ruat, Pu Laldingngheta'n a hmun rawn luah zuiin, "Tih luihna tel miah lova mahni duh thu ngeia Pathian fak tura mipui heti zozai kan inkhawm avangin Pathian hnenah lawmthu i sawi ang u," tiin thuhma tawi te a sawi a. Pathian thu (Gal 5:24,25; 6:40) chhiarin, 'Kros, mihring chhandamna' thupui hmangin Pathian thuchah a sawi.
Pu Madinga hian, "Mihringte kan lo pian chhuah phat aṭang hian, thlatute sualna avangin sual saa piang, chhandam ngai kan ni. Min chhandamna tura Lal Isuan kros-a a tuar hi tuartir nawn tawh lo ila, thlah lova kros pu a vuan tlattu nih i tum ang u. He khawvela kan hlimpui leh kan nuihpuite hi nakin min ṭahtirtu a ni thei tih i hria ang u. Kros vuantute hi nakina van ram chang turte an ni. Kros aia thil dang chhuang ṭhin, kros put aia thil dang put thlang ṭhin mihring kan nih avangin tihsual chang kan nei ṭhin. Hrehawmna hmunah pawh chhel taka Kros pu ṭhin te hi van khawpui tual nuam chang turte an ni," tiin Pathian thuchah ngaihnawm tak, rei si lo a sawi.
Meet a ṭiak dawn tih hriat tak maiin 'Beramno Lal ṭhutphah hmaah, fakna hla sain kei ngei pawh hi, aw ka la han chawl ve tawh ang a, ainkhawmpui kan ṭiak leh tawh lo ang,' tih hla saa vawi khat sak chauh duh khawp lova lak nawn a nih hnuin, Rev. V. Lalmuanpuia, Bialtu Pastor-in Malsawmnain inkhawm a ṭin.
Hnahlan Pastor Bial KṬP Half Yearly Meet vawi 20-na chu Vaikhawtlang Kohhrana a vawi 21-na hmang leh turin, Inkhawm bana Fellowship programme hlimawm tak hman a nih hnuah a ṭiak ang.
Report petu: Lalduhsaka Hnamte