-Malsawmthari Pachuau
Kan dam chhung hian engmah thawk lova faisa ring ringawt thei kan ni lo tih chu kan hre theuh ang. Keini ram angah hi chuan sorkar hnain min daih tak tak dawn lo tih lah thil chiangsa reng a ni bawk. Graduatekher lo, pawl 10 pass tawh; lo lam a hnathawk ka rualpuite ka hriat hian rual hi ka lo awt ve thin. Kum hnih awrh chauh vairama hnathawka awm ve mai mah ni ila mi chaw thalaite hnathawh nasat zia ka hriathian kan khaw thalaite, thiamna sang tak tak nei leh taima tak tak te mitthlaah an lo lang ve thin.
Hotel Management kan tih mai ‘Hospitality Industry’ hi sawi han tum ta i la: 2019 kum khan Diploma Course ka training ve a, tichuan Hotel-ahte thawkin; a hniam ber atang khan bul ka tan ve ta chawt kha a ni a! Eng hna mah hi hna nuam leh awlsam a awm tak tak lova, kuhva kheha sumdawng atanga officer lian ber berte pawhin an thlakhlelh ber chu hahdam tak a awm der der a ni deuh fur awm e. Chutiang chiah chuan he Industry-a hnathawh pawh
hi a awl ai lem lo hle a, inpekna tak tak leh tawrhchhelna nen a thawh ngai a ni. A tlangpuiin Hotel-a hnathawh chu darkar 10 atanga darkar 14 dutyte a ni tlangpui a, kar khatah ni khat chawlh a ni tlangpui bawk.
Chutiang hna hahthlak tak chu thawh ve i châk em? ti ta i la châk lo fe fe chu kan awm furin ka ring. Mahse, han ngaihtuah chiang ta i la; nitin maia ni sen sa hnuaia eikhawp tawk tawk thawh chhuah a, inhlawhna tur a awm loh apianga ina awm leh tawp mai ai chuan a tha zawk lo ang maw ka ti ve thin. Kawng engkimah hian tei rei peih nih te, mi chhel nih te hi a ngai em em reng a ni; chu chu keipawh hian ka la zir ve mek zel anih hi.
Tichuan, he Industry-ah hian lo thawk ve duh ta la eng nge i tih ngai ang? Awle, Certificate neih hi thil pawimawh tak a ni a; ngaihdan erawh a inchen lo viau ang tih pawh ka hria a. Ka lo tawnhriat ve atang hi chuan Certificate neih kher hi a ngai lo tihna chen tam tak ka nei. A chhan chu, Intership/Fresher niin a luh theih a, mi inzir mi i nih a, i tum a nih phawt chuan thla 3 chhung lekin, hlawh nei chungin i zir thiam hman vek. Heng sorkar-in a thlawna zirna an hawn hi thil tha tak a ni a, bo lutuk lova kan thawh theih nana min puitu pawimawh tak a ni. Training turin hun i nei lova, hlawh neih vat i duh bawk anih chuan harsatna a awm lo. Hospitality Industry-a thawk tur hian keini Northeast mite hi min duh em em a; kan tlawmngaihna te, kan taihmakna avang te hian min chhawr an châk ve thin. Tin, hna hi a awm reng emaw tih mai tur a ni a; thla ruk (6) lek experience kan neih tawh chuan hnaah lungngaihna a awm lo.
Kan dai chinte hi tisangin tithui ve deuh ngam i la, hmasawn tur hian pên chhuak ve ngam i la, kan lo peih ta vak lo anih pawhin eng emaw zawng tal chuan hma kan sawn tho tho ang; kan thiamna leh hriatnate tihpunin a lo awm dawn zu nia. Hospitality Industry hi ka tawn chin anih vang a rawn sawi mai ka ni. Vairama hnathawk duh, graduate ni bawk; kawng hre si lo tam tak kan awm pawh ka ring. Hengho tan hlei hleite hian hna hi a va tam tak em! Keini ang, sap tawng pawh a duhtawk a thil sawi hleithei lo; college pawh rap miah lo hi Corporate Company tam tak hian thawk turin min sawm awl lo ve asin! Sorkar hna nghaka i thut veng veng lai khan hun khawhral i ni a, khua i tlai ang tih hi ka hlauhpui em che a ni! Risk lak hi a hlauhawm loh ania aw.
Thahnem ka ngaih luatah mi pawi ka sawi erawh ka hlau hle. A hre ber ber ka ni lova, mite anga tawngkam thiam leh thil han sawizau thiam mi ka ni hek lo; hei ai a fiah zawk a sawidan thiam ka châk kher mai! Engpawhnise, kan thlen chin atang zela hmasawn tur kan ni. Kristian thalai, awm mai mai nih hi a mawi lem lo. Kut leh ke kan nei a, ziak leh chhiar kan thiam phawt chuan kan hma a chhuak hi kan thei ve a ni tih hriain; i tan chona lo ni ve ngei se tih beiseina nen ka rawn ziak ve rawih a ni e.