Kan chang thlan hi fakna hla zulzuia mimal lawmthu sawina tih a ni. Midang tumah phut loin amah leh amah ngei a inhrilh a, mahni infuihna a ni ti ila ka sawi sual awm lo e. Tin, Pathian chu ngaihdamtu Pathian a nihzia inhrilh leh mawlh mawlhin "Ani chuan i khaw lohna zawng zawng ngaidam thin a; I natna zawng zawng a tidam thin a; Boralna lak ata i nun chu a tlan thin a, Ngilneihna leh lainatnate a khumtir thin chia" tih kan hmu bawk a ni. He chang hi chang lar tak leh chhiar hlawhtak a ni a.,Temple-a sak a hlawlh em em thin.
Pathian hian kan tana tha turin ro min relsak thin. Amaherawhchu, kan ringhlel a, kan tana a thil tih tam tak te hi kan haider fo a; kan hrethiam thin lo a ni. He fakhla siamtu pawh hian atana Pathian thiltih that zawng zawngte kha hriatreng loh chang a ngah a, chuvang chuan theihnghilh lo tur leh hrereng turin a infah mawlh mawlh niin a lang.
Sakhaw dang pathiante aia kan Pathian a ropui bik em emna chu Ngaidamtu a nihna hi a ni. Ngaihdam nih baka hlu hi a tam vak awm lo e. Khawvelah hian mahni thiltih vanga rum a, pawi ti em em kan tam hle. Ngaihdamna chang si lo; rilru mangang, rilru buai, tih vak ngaihna hre si lo kan tam hle. India ram chhungah ngei ngei pawh hian sakhaw dang betu mi tamtak chu bawkvakin kilometer tam tak sual ngaihdamna beiseiin Ganga luipuiah te an inchiah a; nimahsela, ngaihdamna chang lova mangang em emin an awm a ni.
Keini erawh chuan engtianga sual pawh ngaidam theitu Pathian kan nei. Kan khaw lohna zawng zawng min ngaidam thin a, kan boral mai tur min chhandam bawk a; zahngaihna khat leh khawngaihna ngah tak Pathian kan neih avang hian kan lo inthlahdah mai ang tih a hlauhawm hle.
Sam 103:5-ah khan "I ka chu thil thain a titlai thin a; Chutichuan i tleirawlna chu mupui anga siam tharin a awm leh thin." tih kan hmu. Mupui hi zirmite chuan kum 70 lai mai a dam thei an ti. Kum 30 anih hian a thla te, a mei te hi a tla a; a kut tin te hi a sei tawh em em a, a kawm chiat a; a duh angin thil a tithei tawh lo thin a ni. Chutih hunah chuan hmun him a zawng a, a him tawk nia a hriat hnuah a inchuk vak vak a; a kut tinte chu a seh thla a, a hmui te khawng thlain a lo insiamthar leh hun a nghak ta thin a ni. Tichuan, a lo insiam thar leh a, a lo chak thar leh thin.
Chutiang tak chuan kan Pathian hian keini pawh hian engtiang takin nge kan hringnun hi kan lo hman tawh a, engtiang taka pawi nge kan lo tih tawh tih hi a hrereng lo. Tunah hian engtin nge ka nun hi ka hman a, engtin nge ka hringnun hi ka chhiar chhoh ve dawn tih hi a ngaipawimawh ber a. Kan sulhnute chu chhui tlak awm loin, chhinchhiah reng tlak pawh awm lo mah se; rei tak chhung Pathian hi beisei ngam loin awm tawh mah ila, kan tih thinte titawh lo ngam a; a lam pan turin min duh a. Kan zawh ngai loh kawng zawh ve turin min sawm reng a, min ngaihdam a; min siam thar leh hi a duh reng a ni.
Lalpa'n a thu malsawm rawh se. Amen.